دریا ائله دیم
دریا ائله دیم
ترکی بیر چشمه ایسه من اونی دریا ائله دیم
بیر سویرق معرکه نی محشر کبرا ائله دیم.
بیر ایشیلتیدی سها اولدوزی تک گوز سنمز
گوز یاشیلما من ااونی عقد ثریا ائله دیم
امیدیم وار که بو دریا هله اقیانوس اولا
اونا ضامن بو زمینه که مهیا ائله دیم
عرفانا چاتماسا شعر و ادب ابقا اولماز
من ده عرفانه چاتیب شعریمی ابقا ائله دیم
ابد یتله یانا شدیم دوغلا حافظه تای
شیرازین شاهچراغین تبریزه اهدا ائله دیم
ترکی نین جانینی آلمیشدی حیاسیز طاغوت
من حیات آلدیم اونا حق ایچون احیا ائله دیم
(فیض روح القدس) اولدی مددیم حافظ تک
من ده حافظ کیمی اعجاز مسیحا ائله دیم
قمه قداره آغزیندا دیل اولمیشدی و سگوش
من سه وینج ائتدیم اونی خنجری خرما ائله دیم
ایندی گویلرده گوزل صفله صفا ایله گزیر
منجلابلاردا اوزون اردگی دورنا ائله دیم
باخ که(حیدر بابا)افسانه تک اولموش بیر قاف
من کیچیک بیر داغی سر منزل عنقا ائله دیم
بوردا (روشن ضمیرین)ده هنرین یاد ائده لیم
من اون دا قلمین طوطی گویا ائله دیم
نه تک ایراندا منیم و لوله سا لمیش قلمیم
باخ که ترکیه ده قافقازدا نه غوغا ائله دیم
باخ که تهراندا نه شاعر لری شیدا ائله دیم
هم(سهندیه) سهندین داغین ائتدی باش اوجا
هممن ئوز قارداشیمین حقینی ایفا ائله دیم
آجی دیللرده شیرین ترکی اولوردی حنظل
من شیرین دیللره قاتدیم اونی حلوا ائله دیم
هر نه قالمیشدی کئچنلردن اونا بال پتگی
اویدیب موملو با لین شهد مصفا ائله دیم
ترکی واللاه آنالار اوخشاغی لایلای دیلی دیر
دردیمی من بو دوا ایله مداوا ائله دیم
شهریار حیف ساوو خدیر بو دگیر مان هله ده
دارتماغا یوخدی دنی من ده مدارا ائله دیم